Монгол Улсын Ерөнхийлөгч У.Хүрэлсүх шинжлэх ухаан, техник технологи, урлаг, утга зохиолын салбарын шилдэг бүтээлд Монгол Улсын Төрийн шагнал хүртээсэн юм.

Олон жилийн нөр их хөдөлмөр, судалгаа, шинжилгээний ажлын үр дүнд түүхэн сурвалж, хөлгөн судар, эрдэмтэн мэргэдийн бүтээл туурвилд тулгуурлан “Чингис хааны ёс суртахуун – Эрх зүйн шастир”, “Монгол ёс суртахуун: Бадрал, уналт, эргэн сэргээлт”, “Хуулийн амин сүнс буюу Чингис хаан, монголчууд” хэмээх гурван боть болон “Ёс суртахууны цагаан толгой” хэмээх монголчуудын ёс суртахууны үнэт уламжлал, үнэ цэнэ, уналт сэргэлт, монгол хүний удирдлага болгох учиртай ёс суртахууны хэм хэмжээг нэгтгэн дүгнэж, улс орны тогтвортой хөгжлийн амин сүнс нь ёс суртахуун болохыг тодотгон, хүн төрөлхтний сэтгэлгээний хөгжилд монголчуудын оруулсан үнэтэй хувь нэмрийг бодит эх баримтад түшиглэн тайлбарласан гарамгай бүтээл туурвисан Шинжлэх ухааны гавьяат зүтгэлтэн, Хууль зүйн шинжлэх ухааны доктор, Монгол Улсын их сургуулийн Эмерит профессор, академич Содовсүрэнгийн Нарангэрэл багш маань юм.

МУИС-Хууль зүйн сургуулийн багш, ажилтан, оюутан залуусын өмнөөс МУИС-ийн Хууль зүйн сургуулийн Эмерит профессор, академич С.Нарангэрэл багшаараа бахархаж байгаагаа дурдахын ялдамд эрүүл энх, мэргэн оюун ухаан, хамгийн сайн сайхан бүхнийг хүсэн ерөөе.