МУИС-ийн Хууль зүйн сургууль болон Тайландын Хаант Улсын Чулалонгкорны Их Сургуультай байгуулсан хамтран ажиллах гэрээний дагуу 2023 оны 05 дугаар сарын 09-ний өдрөөс 2023 оны 05 дугаар сарын 12-ны өдрүүдэд МУИС-ийн Хууль зүйн сургуулийн захирал, доктор, профессор Б.Амарсанаа, Эрдэмтэн нарийн бичгийн дарга М.Уянга, Практик сургалтын төвийн эрхлэгч, доктор, дэд профессор С.Болормаа нар Чулалонгкоры Их Сургуульд айлчиллаа.

Уг айлчлал нь МУИС-ийн Хууль зүйн сургууль, Монгол Улсаас Тайландын Хаант Улсад суугаа Элчин сайдын яам болон Чулалонгкорны Их Сургуулийн хамтын ажиллагаагаар зохион байгуулагдсан бөгөөд МУИС-ийн Хууль зүйн сургуулийн захирал, доктор, профессор Б.Амарсанаа нь “Монгол Улс дахь одоогийн эрх зүйн хөгжил: хувийн болон арилжааны эрх зүй” сэдвийн хүрээнд илтгэл хэлэлцүүлж, Чулалонгкорны профессор, багш нар Монгол Улс дахь хүний эрхийн төлөв байдлын талаар олон сонирхолтой асуултуудыг асуусан. Мөн дараах 2 чиглэлд айлчлалын зорилго оршино. Үүнд:

1. МУИС-ийн Хууль зүйн сургууль сургалтын хөтөлбөрөө шинэчилж байгаатай холбоотойгоор Чулалонгкорны Их Сургуулийн сургалтын хөтөлбөртэй танилцах, харилцан туршлага солилцох;
2. Хамтын ажиллагааг өргөжүүлэх зарим асуудлын талаар ярилцсан бөгөөд энэ хүрээнд шүүхийн мэтгэлцээний тэмцээн зохион байгуулах, оюутан солилцоо хөтөлбөр хэрэгжүүлэх боломж зэрэг багтав.

Хуулийн сургуулиудын цаашдын хамтын ажиллагаа өргөжиж, олон салбарт харилцан туршлага солилцох болов уу.