МУИС-ийн Хууль зүйн сургууль Онц бөгөөд бүрэн эрхт элчин, хууль зүйн доктор Л.Хашбатын нэрэмжит оюутны олон улсын эрх зүйн сэдэвт эрдэм шинжилгээний хурлыг 2024 оны 5 дугаар сарын 18-ны өдөр амжилттай зохион байгууллаа. Хурлыг 2000-аад оны дунд үеэс хойш зохион байгуулж буй ба 2023 оноос хойш англи хэлээр хийж байна.

Тус хуралд зориулан Л.Хашбат багшийн гэр бүлээс тэтгэлэг олгодог бөгөөд уг тэтгэлгийг байр эзэлсэн оюутнуудад шагнал болгон өгдөг. Энэ жил Л.Хашбат багшийн гэр бүлийг төлөөлөн түүний охин, УИХ-ын гишүүн асан Х.Хулан, ач, зээ охид Алунгоо, Дария нар хүрэлцэн ирж мэндчилгээ дэвшүүлэв.

Хурал зохион байгуулагчид Л.Хашбат багшийн гэр бүлийн төлөөлөл, шүүгчид, оюутнуудын хамтаар

“Онц бөгөөд бүрэн эрхт элчин, хууль зүйн доктор Л.Хашбатын тухай товчхон

Онц бөгөөд бүрэн эрхт элчин, хууль зүйн доктор Лүдэвдоржийн Хашбат нь 1961 онд БНМАУ-ыг НҮБ-д элсүүлэх ажлын хэсэгт ажиллаж байсны дээр олон тооны дипломат бага хуралд, тухайлбал 1969 оны Олон улсын гэрээний эрх зүйн Венийн конвенцийн бага хуралд оролцож, эх орноо төлөөлөн гарын үсэг зуржээ. Мөн Шинэ Дели, Москва, Нью-Йорк, Лондон, Белград зэрэг дэлхийн олон нийслэл хот дахь БНМАУ-ын дипломат бие бүрэлдэхүүнд болон Югослав, Италид Элчин сайдаар ажиллаж байсан манай улсын тэргүүлэх дипломатуудын нэг юм. Тэрээр 1973 онд Москвагийн Дипломат академид “Монгол Улсын олон улсын эрх зүйн статус: Түүх, эрх зүйн асуудал” сэдвээр хууль зүйн докторын зэрэг хамгаалсан. Л.Хашбат нь МУИС-т олон улсын эрх зүйн хичээлийг мэргэжлийн багшийн хувиар анхлан заасан ба 2006 онд насан эцэслэх хүртлээ багшилсан юм.”

Энэ жил нэгдүгээр шатанд шалгарсан 5 илтгэлийг хурлаар хэлэлцүүлснээс тэргүүн байрыг эрх зүйн 4 дүгээр түвшний оюутан С.Билэгт-Очир “Developing approach to the legitimacy of international law: Developing countries’ role in rule-making” илтгэлээр, дэд байрыг 3 дугаар түвшний оюутан Б.Энхжин, А.Жанерке нар “Challenges in Executing Interim Measures in Arbitration” илтгэлээр, гутгаар байрыг 4 дүгээр түвшний оюутан Э.Энхжин “Free Trade and Protectionism: Examining Customs Law and Policy of Mongolia on Wheat” илтгэлээр, шагналт байрыг 3 дугаар түвшний оюутан С.Түмэнхүслэн, Б.Акерке нар  “Ensuring Compliance with the Principle of Distinction in Drone Warfare: Navigating the Ethical and Legal Challenges of Targeting Civilians v. Combatants, with a Case Study of US Drone Operations” илтгэлээр, мөн 3 дугаар түвшний оюутан С.Энх-Үжин “Artificial Intelligence and International Law” илтгэлээр тус тус эзлэлээ. 5 байрт шалгарсан оюутнуудыг тэтгэлгээс гадна өргөмжлөл, мэргэжлийн ном, сэтгүүлээр шагнан урамшууллаа. Шүүгчээр олон улсын эрх зүй судлаач, Эм Жи Эл ХХН-ийн партнер Н.Чимгээ, МУИС-ийн Хууль зүйн сургуулийн олон улсын эрх зүйн анги төгсөгч Кийстөүн Легал ХХК-ийн захирал А.Мандуул, Цогд энд Нандин ХХН-ийн партнер С.Жавхлан нар ажиллав.

Хуралд илтгэл хэлэлцүүлсэн оюутнууд, шүүгчид

Энэ жил хурлыг зохион байгуулах бүрэлдэхүүнд Нийтийн эрх зүйн тэнхимийн ахлах багш М.Мөнхбат, Нийтийн эрх зүйн тэнхимийн багш Э.Туулайхүү, МУИС-ийн Шинжлэх ухааны сургуулийн Гадаад хэлний тэнхимийн хууль зүйн англи хэлний багш Ц.Энхцэцэг болон МУИС-ийн Хууль зүйн сургуулийн эрх зүйн 4 дүгээр түвшний оюутан Б.Билэгт, О.Энх-Учрал, 3 дугаар түвшний оюутан А.Анударь, А.Мишээл нар ажиллав.

Хурлын зохион байгуулалтад ажилласан багш нар, оюутнууд

Хуралд илтгэл хэлэлцүүлсэн оюутнууд,  хамтран ажилласан Л.Хашбат багшийн гэр бүл, шүүгчдэдээ, хүрэлцэн ирсэн бүгдэд талархал илэрхийлье!