Үндсэн хуулийн эрх зүйн хүрээлэн шинжлэх ухааны сургалтыг зохион байгуулав.

МУИС –ийн Үндсэн хуулийн эрх зүйн хүрээлэн 2024 – 06 – 14 –нд эрдэм шинжилгээ, судалгааны арга зүйн лекцийг зохион байгуулж,  Монгол Улсын Төрийн соёрхолт, академич Р. Энхбат  “Тоглоомын онол - арга зүй” сэдвээр Хууль Зүйн Сургуулийн эрдэмтэн, судлаач багш нарт лекц уншиж, эрдэм судлал, судалгааны арга зүйд их хувь нэмрийг орууллаа.

ШУА-ийн Математик, тоон технологийн хүрээлэнгийн Математикийн салбарын эрхлэгч, Монгол Улсын Төрийн соёрхолт математикч, академич, профессор Р.Энхбат нь АНУ-ын Стэнфордийн их сургуульд “Тоглоомын онолын орчин

үеийн чиг хандлага” сэдвээр илтгэл хэлэлцүүлсэний дараа МУИС –ийн Үндсэн хуулийн эрх зүйн хүрээлэнгийн урилгаар хуульч эрдэмтэн, багш, судлаачдад лекц уншсан нь шинэлэг байв.

Монгол Улсын Төрийн соёрхолт, академич Р. Энхбат нь “Тоглоомын онол” –ын арга зүйгээс гадна “Тоглоомын онол” –ыг хөгжүүлсэн, өөрийн шинэ онол, тэнцвэрүүд болох Анти-Нэш, Анти-Бержийн сэдвээр лекц уншиж, эрдэмтэн судлаачдын эрдэм судлалын ажилд үнэтэй хувь нэмрийг оруулсанд гүнээ талархаж байна.

 “Тоглоомын онол” нь ХХ зууны II хагасаас нийгмийн шинжлэх ухааны салбарт, ялангуяа эдийн засгийн салбарт түгээмэл хэрэглэгдэх болсноос гадна эрх зүйн шинжлэх ухаанд ч хэрэглэгдэж байна. Харин  Монгол Улсын хувьд “Тоглоомын онол” нь нийгэм, эдийн засаг, хууль зүйн салбарт оновчтой хэрэглэгдэхгүй байгаагийн улмаас Монгол Улсад ашиггүй, бусдын тоглоомын дүрмээр гэрээ байгуулж, эдийн засгийн хөгжилд сөргөөр нөлөөлөх явдал байсаар байна. Иймд “Тоглоомын онол” нь материаллаг болон процессын эрх зүйн судалгаанд хэрэглэгдэх онол учраас, энэхүү лекц нь Монгол Улсын эрх зүйн шинжлэх ухааны онол – арга зүйн хөгжилд төдийгүй практикт ихээхэн хувь нэмэр оруулна гэж үзэж байна.