МУИС-ИЙН ХУУЛЬ ЗҮЙН СУРГУУЛИЙН БАГ АЗИ КАП ОЛОН УЛСЫН ЭРХ ЗҮЙН ШҮҮХИЙН МЭТГЭЛЦЭЭНИЙ ТЭМЦЭЭНД ОРОЛЦОВ.

МУИС-ийн Хууль зүйн сургуулийн баг (эрх зүйн 4 дүгээр түвшний оюутан С.Түмэнхүслэн, Б.Энгүүн, эрх зүйн 5 дугаар түвшний оюутан Э.Мөнхболор, Э.Эрдэнэбат) Ази Кап олон улсын эрх зүйн шүүхийн мэтгэлцээний тэмцээний 2 дугаар шатанд шалгаран оролцлоо. Тэмцээний энэ шат 2024 оны 8 дугаар сарын 27, 28-ны өдрүүдэд Япон Улсын Токио хотод зохион байгуулагдав.

Оюутнууд багшийн хамтаар

1999 оноос хойш зохион байгуулагдаж буй “Ази Кап/Asia Cup” олон улсын эрх зүйн шүүхийн мэтгэлцээний тэмцээн нь Азийн шилдэг их сургуулиуд оролцдог олон улсын эрх зүйн чиглэлийн бүс нутгийн томоохон тэмцээнүүдийн нэг юм. Азид “Эрх зүйт ёс”(Rule of Law)-ыг тогтооход хувь нэмэр оруулах уриатай тус тэмцээн нь бүс нутгийн оюутнуудын олон улсын эрх зүйн кэйст нэхэмжлэгч, хариуцагчийн үүднээс үндэслэл бүхий бичгэн тайлбар бичих, үүний дагуу шүүх хуралдаан дээр амаар мэтгэлцэн талуудын байр суурийг хамгаалах ур чадварыг хөгжүүлэх замаар салбарын шилдэг мэргэжилтэн бэлтгэхэд дэм болох зорилготой. Уг тэмцээний зохион байгуулагчаар Япон Улсын Гадаад харилцааны яам, Японы Олон улсын эрх зүйн холбоо ажилладаг.

Энэ жил эхний шатанд нийт 66 баг бичгэн тайлбар (memorial and counter-memorial) илгээснээс 16 баг дараагийн шатанд шалгарсны нэг нь МУИС-ийн Хууль зүйн сургуулийн баг юм.

2 дугаар шатанд Сингапур, Филлиппин, Тайланд, Малайз, Вьетнам, Индонез, Камбож, Япон, Солонгос, Узбекистан, Монгол, Бангладеш, Непал, Энэтхэг, Хонконг гэсэн 16 орны баг шалгаран оролцов.  Энэ шатанд нэхэмжлэгчийн талаас МУИС-ийн Хууль зүйн сургуулийн баг Узбекистаны Ташкентийн улсын их сургуулийн багтай, хариуцагчийн талаас Тайландын Тамасаттын их сургуулийн багтай тус тус тоглов.

Нэхэмжлэгчийн талаас тоглосон багтай Хариуцагчийн талаас тоглосон багтай 

Тэмцээний энэ жилийн кэйс нь хүний эрхийн зөрчлийн хариуд худалдааны арга хэмжээ авсанаас үүдэлтэй улс хоорондын эрх зүйн маргааныг олон улсын аль шүүх харъяалан шийдвэрлэх, тус арга хэмжээ нь Тариф, худалдааны ерөнхий хэлэлцээр (GATT)-ийн III (4) зүйлд нийцэж буй эсэх, улмаар тус хэлэлцээрийн XX (a) зүйлийн дагуу зөвтгөгдөх эсэх тухай байв. Үүгээрээ кэйс нь олон улсын шүүхийн харъяалал, хүний эрхийн талаар улсын хүлээх үүрэг, Дэлхийн худалдааны байгууллагын эрх зүй (WTO Law)-н дагуу олон улсын худалдаанд баримтлах үндэсний дэглэм болон түүний зөрчлийг зөвтгөх нийтлэг үндэслэл (general exception) зэрэг олон улсын эрх зүйн хэд хэдэн ээдрээ төвөгтэй асуудлыг хамарсан.

МУИС-ийн Хууль зүйн сургуулийн багийн дасгалжуулагчаар Нийтийн эрх зүйн тэнхимийн багш Э.Туулайхүү ажиллав.

Тэмцээний төгсгөлд багш, оюутнууд олон улсын шүүх, арбитрын практикт ажиллах кареерийн ямар боломж байдаг талаарх “Career Paths in the Field of International Litigation and Arbitration” семинарт мөн хамрагдав. Тус семинарыг олон улсын шүүх, трибуналд янз бүрийн улс орныг төлөөлөн оролцдог арвин туршлагатай хуулийн фирмүүд болох TMI Associates, Nishimura & Asahi болон Олон улсын эрх зүйн комиссын гишүүн, Оксфордын их сургуулийн профессор Дапо Аканде удирдан явуулав.

Энэ дашрамд тэмцээнд оролцсон МУИС-ийн Хууль зүйн сургуулийн оюутнуудын Токиод очиж ирэх онгоцны билетийн зардлыг ивээн тэтгэж дэмжсэн Nomadix Business Law Firm ХХК, Өмгөөллийн Fidelitas Partners ХХН, Хан Хөгшин Интэрнэшнл ХХК-д сургуулийн зүгээс гүн талархал илэрхийлье.

Тэмцээн нь оюутнуудыг дараа дараагийн уралдаан тэмцээнд оролцоход сайн суурийг тавьж, ирээдүйд олон улсын эрх зүйн салбарт ажиллах шилдэг мэргэжилтэн болох урам зориг өгсөн гэдэгт итгэлтэй байна.