Мэдээ мэдээлэл

МУИС-ИЙН ХУУЛЬ ЗҮЙН СУРГУУЛИЙН БАГ 10 ДАХЬ УДААГИЙН “ОЛОН УЛСЫН ХҮМҮҮНЛЭГИЙН ЭРХ ЗҮЙН ШҮҮХИЙН МЭТГЭЛЦЭЭНИЙ ҮНДЭСНИЙ АВАРГА ШАЛГАРУУЛАХ ТЭМЦЭЭН”-Д ТҮРҮҮЛЛЭЭ.

2024 оны 10 сарын 21

МУИС-ИЙН ХУУЛЬ ЗҮЙН СУРГУУЛИЙН БАГ 10 ДАХЬ УДААГИЙН “ОЛОН УЛСЫН ХҮМҮҮНЛЭГИЙН ЭРХ ЗҮЙН ШҮҮХИЙН МЭТГЭЛЦЭЭНИЙ ҮНДЭСНИЙ АВАРГА ШАЛГАРУУЛАХ ТЭМЦЭЭН”-Д ТҮРҮҮЛЛЭЭ.

“Олон улсын хүмүүнлэгийн эрх зүйн шүүхийн мэтгэлцээний үндэсний аварга шалгаруулах тэмцээн” (International Humanitarian Law Moot – an Inter-University Competition for Mongolia) -ийг Олон Улсын Улаан Загалмайн хороо, Монголын Улаан Загалмай Нийгэмлэгийн зүгээс дотоодын их, дээд сургуулиудтай хамтран Монгол Улсад 2014 оноос эхлэн зохион байгуулж буй бөгөөд энэ жил 10 дахь удаагаа 2024 оны 10 дугаар сарын 19-ний өдрүүдэд Их Засаг олон улсын их сургуулийн Хууль зүйн сургууль дээр зохион байгуулав. 

 

МУИС-ийн ХЗС-ийн багууд дасгалжуулагч багш болон шүүгч Марва Шаббарын хамт

 

Энэ жилийн тэмцээнд МУИС-ийн Хууль зүйн сургууль, Дотоод хэргийн их сургууль, Их Засаг олон улсын их сургууль зэрэг дотоодын шилдэг их сургуулиудын багууд өрсөлдсөнөөс аварга (winning team)-аар МУИС-ийн Хууль зүйн сургуулийн 4 дүгээр түвшний оюутан А.Мишээл (илтгэгч), С.Түмэнхүслэн (илтгэгч), Э.Ариун-Ундрал (судлаач) нарын баг шалгарч 2025 оны 3 дугаар сард болох Ази-Номхон далайн бүсийн  тэмцээн (23rd Red Cross International Humanitarian Law Moot (Asia-Pacific Region))-д улсаа төлөөлөн оролцох эрх авлаа.  

 

   

Ялагч баг шүүгч нарын хамт

 

Дэд байр (runner-up team)-ыг мөн сургуулийн 5 дугаар түвшний оюутан Н.Билгүүн (илтгэгч), 3 дугаар түвшний оюутан П.Болортуяа (илтгэгч), 4 дүгээр түвшний оюутан О.Галдмаа (судлаач) нарын баг эзлэв. Мөн тус сургуулийн 4 дүгээр түвшний оюутан А.Анударь (илтгэгч), Б.Энгүүн (илтгэгч), Б.Нинжин (судлаач) нарын баг хагас шигшээ (semi-final)-д шалгарав.

 

Үүнээс гадна дараах шагналын эзэн боллоо. Үүнд:

Шилдэг илтгэгч (Best Mooter) – П.Болортуяа

Илтгэгчийн хоёрдугаар байр (Second Mooter) – Н.Билгүүн

Бичгийн ажлын оноогоор:

  • Прокурорын шилдэг яллах дүгнэлт (Best memorial (Prosecutor) - А.Мишээл, С.Түмэнхүслэн, Э.Ариун-Ундрал
  • Прокурорын яллах дүгнэлтийн нэгдүгээр байр (First honorable submission (Prosecutor) - Н.Билгүүн, П.Болортуяа, О.Галдмаа
  • Яллагдагчийн тайлбарын хоёрдугаар байр (Second Honorable Submission (Defendant) -  А.Мишээл, С.Түмэнхүслэн, Э.Ариун-Ундрал

 

Тэмцээнд МУИС-ийн Хууль зүйн сургуулиас гурван (3) багийг бэлтгэн оруулсан ба багийн гишүүдийг сонгон шалгаруулж дасгалжуулах ажлыг Нийтийн эрх зүйн тэнхимийн багш Э.Туулайхүү хариуцан гүйцэтгэв. Мөн МУИС-ийн Хууль зүйн сургуулийн олон улсын эрх зүйн хөтөлбөрийн төгсөгч Б.Ариунзаяа оюутнуудад үндэсний болон бүсийн тэмцээнд оролцсон туршлагаа хуваалцан бэлтгэлд дэмжлэг үзүүлэв.  

 

 

Тэмцээнд оролцсон нийт оюутан Олон улсын Улаан загалмайн хорооны шүүгчийн хамт

 

Сургуулийн зүгээс тэмцээнд оролцсон багууддаа баяр хүргэж , дасгалжуулсан багш, дэмжсэн төгсөгч нартаа талархал илэрхийлье!