Австралийн Мельбурны Их Сургуулийн Хууль зүйн сургууль болон Монгол Улсын Их Сургуулийн Хууль зүйн сургууль хамтран хоёр дипломт хөтөлбөрийн гэрээ байгууллаа

Австралийн Мельбурны Их Сургуулийн Хууль зүйн сургууль болон Монгол Улсын Их Сургуулийн Хууль зүйн сургууль хамтран монгол оюутнуудад дэлхийн түвшний боловсрол эзэмших боломжийг олгох зорилго бүхий хоёр дипломт хөтөлбөрийн гэрээг байгууллаа. Гэрээнд Мельбурны Их Сургуулийн Хууль зүйн сургуулийн дэд захирал, профессор Жианли Чен, МУИС-ийн Хууль зүйн сургуулийн захирал, профессор Б.Амарсанаа нар гарын үсэг зурж, хүчин төгөлдөржүүлэв.

Түүнчлэн гэрээг үзэглэх ёслолд Австрали улсын элчин сайдын яамны дэд тэргүүн Эндрю Берримэн, Монгол Улсын Засгийн газрын дэд дарга Б.Батцэцэг, МУИС-ийн Сургалт, оюутны хөгжил эрхэлсэн проректор Д.Заяабаатар, МУИС-ийн Хууль зүйн сургуулийн эрдэмтэн нарийн бичгийн дарга, доктор М.Уянга, Нийтийн эрх зүйн тэнхимийн эрхлэгч, доктор Ж.Эрхэсхулан, Хувийн эрх зүйн тэнхимийн эрхлэгч, доктор Б.Улаанбаатар тэргүүтэй эрхмүүд оролцлоо.

Тус хөтөлбөрийн хүрээнд жил бүр МУИС-ийн 3 дугаар түвшнийг дүүргэсэн, шилдэг хоёр оюутан Мельбурны Их Сургуулийн магистрын хөтөлбөрт суралцах эрхтэй болох бөгөөд хөтөлбөртөө амжилттай хамрагдсан оюутнууд төгсөхдөө МУИС болон Мельбурны Их Сургуулийн хоёр дипломтой төгсөх боломжтой юм.

Австралийн Мельбурн хотод байрлах Мельбурны Их Сургууль нь дэлхийд чансаагаараа 13-т эрэмбэлэгддэг бөгөөд хууль зүйн орчин үеийн хөтөлбөр, боловсронгуй академик орчноороо алдартай билээ.