Анхдугаар Үндсэн хууль батлагдсаны 100 жилийн ойг тохиолдуулан Үндсэн хуулийн эрх зүйн хүрээлэн нь Улсын Их Хурлын тамгын газар, түүний Парламентын судалгаа хөгжлийн хүрээлэн болон Шинжлэх ухааны академийн Түүхийн хүрээлэнтэй хамтран “Үндсэн хуульт ёс: өнгөрсөн, одоо, ирээдүй” сэдэвт олон улсын эрдэм шинжилгээний хурлыг 2024 оны 11 дүгээр сарын 25-нд амжилттай зохион байгууллаа.

Олон улсын эрдэм шинжилгээний хурал нь үндсэн хуралдаанаас гадна “Үндсэн хуульт ёс, парламентат ёсны түүхэн хөгжил, чиг хандлага”, “Үндсэн хуулийн эдийн засаг ба гүйцэтгэх эрх мэдэл”, “Үндсэн хуулийн хамгаалалт, хүний эрх ба шүүх эрх мэдэл”, “Үндсэн хуулийн хөгжил ба салбар дундын хөгжил” салбар хуралдаанаар явагдав.

Олон улсын эрдэм шинжилгээний хуралд түүх, улс төр судлал, эрх зүйн шинжлэх ухааны эрдэмтэн судлаачдаас гадна ХБНГУ, Япон, Энэтхэг, БНСУ, ОХУ-ын эрдэмтэн судлаачид оролцож, үндсэн хуульт ёсны түүхэн хөгжил, сургамж, үнэт зүйл, хөгжлийн чиг хандлагыг тодорхойлсон илтгэлүүдийг хэлэлцүүлсэн нь Үндсэн хуулийн хөгжилд үнэтэй хувь нэмрийг оруулсан болно.